Sing Afrikaner Sing

“Sing Afrikaner Sing.” En dis presies wat Bok van Blerk doen. Maar meer as dit, hy moedig alle Afrikaners aan om saam te sing. Dit behoort natuurlik geen probleem te wees nie aangesien Bok bekend is vir sy lekker saamsing treffers. Nou gaan dit selfs makliker wees met die eerste treffer vanaf sy gelyknamige nuwe CD wat in Junie die lig sien, “Sing Afrikaner Sing.”
Die nuwe album volg in die voetspore van Bok se vorige CD, “Steek die vure aan,” wat platinumverkope aangeteken het. Kritici en Bok-liefhebbers was gaande en Bok het wyd lof ingeoes met nominasies by die SAMA-, Ghoema en Tempo Toekennings.

Die nuwe CD onderstreep maar net weer Bok se gewildheid by aanhangers van Afrikaanse musiek en is deel van die staatmaker kunstenaar se arsenaal aktiwiteite vir die res van 2015. Daar’s ‘n toer na België op die kaarte, asook ‘n besoek aan die Verenigde Koninkryk wat optredes rondom die 2015 Rugby Wêreldbeker sal insluit. En Bok die akteur sit ook nie stil nie met heelwat nuwe films wat in wording is.
Maar voor dit als gebeur, gaan “Sing Afrikaner Sing” vrygestel word. Die speellys sluit in liedjies met titels soos “Bok vir sports,” “Bosveld Afrika,” “Soos in die ou dae” en “Soutwater,” ‘n bonussnit wat in die film “Leading Lady” verskyn het. Daar’s ook ‘n duet met die Afrikaanse musiek ikoon Laurika Rauch met die naam “Ek het.” Johan Vorster, Ewald Coleske, Christoph Kotze, Pietman Geldenhuys, Fred den Hartog, Hunter Kennedy en Bok self het almal geskryf aan die liedjies wat op die finale lys van liedjies sal verskyn.
Vir meer inligting oor wat Bok mee besig is en oor die nuwe album, volg hom op Twitter: @BokvanBlerkReal

Bok van Blerk: Nuwe video ‘sweep nié op nie’

Deur Jody Nel Vrydag 05 Junie 2015 17:12

 

Bok van Blerk hoop sy nuwe liedjie sal as ’n boodskap aan Afrikaanssprekendes dien om hul verskille eenkant toe te skuif en saam te staan.
Die ​musiekvideo vir “Sing Afrikaner Sing” is Vrydagmiddag op sy webblad uitgereik. ’n Voorskou daarvan is reeds meer as 30 000 keer op YouTube gekyk.
Van Blerk sê verskillende mense sal verskillende interpretasies van die liedjie, wat deur Johan Vorster en Ewald Coleske geskryf is, hê.
“Vir my gaan dit oor taal. Dit is definitief nie ’n opsweping nie. Dit gaan oor taal en kultuur.
“Daar is amper sewe miljoen mense in die land wat Afrikaans as hul eerste taal kies. Taal is nie op velkleur of ras gegrond nie,” het hy gesê.
In die liedjie sing hy: “laat jou stem gehoor word; laat jy nooit verdwyn”.
Die eerste deel is ’n vermaning aan mense om te praat as iets hulle pla. Hy meen die tweede deel kan moontlik gesien word as ’n vrees oor die toekoms van die taal, maar hy het beaam dat enigiemand hul eie interpretasie daarin kan lees.
In nog ’n liriek, “want die groot verraad kom uit ons eie mense”, kap hy na die media wat hy meen mense se woorde kan verdraai om koerante of tydskrifte te verkoop. Dit verwys ook na verdeeldheid onder Afrikaners.
“Afrikaners is baie keer hul grootste vyand en dit is nie nodig nie.
“Afrikaners sukkel om saam te staan. Daar is ’n gesegde; As jy 10 Afrikaners saam kry, is daar 20 kerke vir hulle.”
Die liedjie kap ook na mense wat vingers wys en waarsku hulle dat “die wiel eendag (sal) draai”.
Van Blerk het die liedjie opgeneem met die hoop dat mense wat daarna luister, besef dit is nie nodig om mekaar af te breek nie.
“Dit is ’n ‘saamstaan’-liedjie, amper ’n ‘word wakker’-liedjie.
“Jy hoef nie skaam te wees oor wie jy is nie, maar as jy respek vir jou taal en kultuur wil hê, moet jy ook ander se taal en kultuur respekteer,” sê Van Blerk.